top of page

Япон стандартын бетон зуурмаг үйлдвэрлэж эхэллээ

Монгол орны эрс тэс уур амьсгалаас үүдэн барилгын салбарын бүтээн байгуулалт жил бүр 4-5 сарын хугацаанд зогсонги байдалд шилжиж байна. Энэ нь төслийн хугацааг уртасгаж цалин хөлс, техникийн сул зогсолт болон инфляцаас үүдэх төслийн зардлыг нэмэгдүүлдэг. Түүнчлэн орон сууц, барилга, байгууламж захиалсан иргэд, аж ахуй нэгжийн хүлээлтийг уртасгаж түүнтэй холбоотой зардлыг ч өсгөж байгаа юм. Тиймээс цаг уурын нөхцөл байдлаас үл хамааран бетон цутгалтын ажил хийх, дотоодын бетон зуурмагийн чанар, стандартыг нэмэгдүүлэх зорилгоор “Монголын Алт МАК” компани барилгын салбарын ээлжит хөрөнгө оруулалтаа хийж “МАК Конкрит” бетон зуурмагийн үйлдвэрийг нээлээ. 


Салбарын хамгийн тэргүүлэгч тоног төхөөрөмж, чанар стандартыг нэвтрүүлэхийг чухалчилдаг МАК компани энэ удаад Япон улсын 90 жилийн туршлагатай Aizawa групптэй хамтран ажиллах гэрээ байгуулж “МАК Конкрит” бетон зуурмагийн үйлдвэрийг ашиглалтад оруулаад байна.


Бетон зуурмаг
Aizawa болон Монголын Алт МАК хамтран Монголд өндөр чанарын бетон зуурмагийн үйлдвэр байгуулах хэлэлцээр байгуулав. 2023.09.25

Уг үйлдвэр нь Бүгд Найрамдах Турк улсын ELKON брэндийн тоног төхөөрөмжөөр тоноглогдсон, Aizawa группийн компьютерын хяналт бүхий бүрэн автомат технологитой бөгөөд Японы Аж Үйлдвэрийн Стандартад (JIS) нийцсэн цагт 150м3 бетон зуурмаг зуурах хүчин чадалтай үйлдвэр юм. Зуурмагийн маркийн хувьд M500-г үйлдвэрлэх бөгөөд М1000 хүртэлх өндөр чанарын зуурмаг үйлдвэрлэх зорилт тавиад байна. Мөн барилгын талбай бүрийн онцлог, цутгалт хийх үеийн цаг уурын байдал, тээвэрлэлтийн хугацаа зэрэг янз бүрийн нөхцөлийг харгалзан орц найрлагаа тохируулан хамгийн найдвартай, шинж чанарын өөрчлөлтгүй бүтээгдэхүүнийг санал болгож байна. Тэр дундаа Монголын барилгын салбарын хамгийн тулгамдсан асуудал болох хүйтний улиралд барилга угсралтыг үргэлжлүүлэхэд шаардлагатай их хэмжээний бетон зуурмагийг тасралтгүй нийлүүлэх боломжийг бүрдүүлсэн гэдгээрээ онцлог юм. 


Харин цаашид үйлдвэрийн ус, эрчим хүч, хаягдлын менежментийг ногоон стандартад нийцүүлэн хөгжүүлж, орчин үеийн дэвшилтэт технологи болох 3D хэвлэлийн технологийг нэвтрүүлэхээр төлөвлөөд байна. 



Comments


bottom of page